Sanaartukkat nutaat nunaminertaareersumut sapinngisaq tamaat naleqqussarneqassapput. Sanaartornerup teknikkikkut aningaasatigullu imminut akilersinnaasumik naammassineqarnissaanut pisariaqartinneqartumik taamaallaat nunagissaasoqassaaq. Nutaanilli sanaartortoqartillugu sumiiffik imertaajarneqarsinnaaniassammat nunagissaasoqarnissaanik kommunalbestyrelse piumasaqaateqarsinnaavoq. Nunap nammineq pissusiata tamanna ajornartinngippagu naqqup iluanik taamaallaat aaqqissuussisoqarsinnaavoq.
Init allersaasa nunap qaaniinnissaat qulakkeerniarlugit toqqaaviit pisariaqartinneqartumit portunerutinneqassanngillat. Inoqarfinni mikinerusuni illut toqqavii inoqarfinni anginerusuni illut toqqavinnit portunerusinnaapput, taakkunani aputaajaasarneq ajornakusoornerusarmat.
Ataasiakkaani betonimik toqqavilersuinissaq aamma sukanik iikkatut silarlertut qalliinissaq piumasarineqarsinnaavoq, sanaartornermi illuliortaatsimi kusanassuseq kissaatigineqartoq pillugu.