Illorsuup portusuup isikkua
Portusuunik sanaartornermi aamma sanaartukkat ilusaanik annertuumik akisussaaffiliivoq. Illorsuit portusuut allanit sunniuteqarnerusarput illoqarfiup ataatsimut isikkua isiginiassagaanni. Illorsuup portusuup nalinginnaasumik sanaartukkanit annerusarpoq, illoqarfiullu iluani annerusumik ersarissuusarluni. Taamaammat illorsuit portusuut ilusilersugaanermikkut annermik akisussaaffeqartumik tunniussiffissaapput uuttuutit assigiinngitsut pingasut najoqqutaralugit suliarineqartariaqarlutik illorsuit portusuut qanoq misiginissaat eqqarsaatigalugu.
Uuttuut annertooq: Illorsuaq portusooq ungasianit qanoq misinnarpa? Qalipaasersorneranit, atortuinit, pingaarnertut annertussusaanit, illorfimmi illorsuarnut portusuunut allanut sunniutai il.il. eqqarsaatigalugit.
Uuttuut akunnattoq: Illorsuaq portusooq illoqarfiup immikkoortuanut qanoq sunniuteqartarpa, illoqarfimmi qanoq tulluutsigaa illorsuarlu sanaartukkanut pioreersunut allanut qanoq isikkoqarpa?
Qanimut uuttuut: Illorsuaq qanimut qanoq misigineqartarpa, inuit illorsuarmik naapitsinerminni ileqqunik qanoq misigitinneqartarpat?
Qanittumik misinnarnera qulakkeerniarlugu annerpaamik pingasunik quleriiaanik tunngaveqarluni ilusilersorneqartariaqarpoq. Tunngavia ima iluseqarlunilu atungaassaaq uninngaffigissallugu tamanilluunniit tikinneqarsinnaalluni kajuminnarluni.
Anorit sunniutai
Illorsuit portusuut silaannarmit qutsinnermik apparsaartunik aqqusinerni silaannarmik aalarululersitsisarput silaannaallu kissarneranik appartitsisarlutik. Illorsuit portusuut imminnut qanittut aamma anorimik kaavittuliortitsisinnaapput imminnut inissisimanerat, sumut samminerat portussusaallu apeqqutaallutik. Sanaartortitsisup siunissami anorinut tunngasut nassuiartariaqarpai illorsuup eqqaani tikinneqarfissaa eqqarsaatigalugit pitsaasumik anorinut inissisimanissaa qulakkeerniarlugu, matumanilu aputit pillugit naatsorsorlugit illoqarfiullu eqqaatungaani inissat eqqarsaatigalugit.
Tarranik sunniutai
Illorsuup portussusaa naapertuuttumik tarraqartitsisarpoq. Issittumi seqernup pukkilisarnera illorsuit portusuut takisuunik tarraqartittarpai illoqarfiup ilaanut sanaartukkallu eqqaaniittut sunnertarlugit. Illoqarfimmi tarraqarpallaat nillertumik taartumillu misigisimanartarput, uninngaffigissallugit sukisaarsaarfigissallugilluunniit kajuminnaratik. Tamanit orninneqarsinnaasuni pitsaasumik tarraqarnissaat qulakkeerniarlugit ilorsuit portusuut illoqarfiup ilaanut pingaarutilinnik inissisimasuni pioreersuni nutaanik tarraqalersitsisunik sanaartorfiusariaqanngilaq.
Aamma portusuunit sanaartukkat eqqaani sanaartorfioreersuni pissutsinut ajornerulersitsisariaqanngillat. Tamanna sanaartortitsisup nassuiassavaa ilaatigut 5x5 pillugu malitassaq atorlugu.
5x5 pillugu malitassaq:
Eqqarmiunit illup silataanit 5 meterit upernalerneranit ukialerneranut (21 marsi / septembari) ulluunerani 5 tiiminik qaamaneqarnissaa qulakkeerneqassaaq. Tamanna ulluunerani qaamanermik issuaanikkut naatsorsorneqassaaq.
Illup silataani nunaminertat aaqqissuunneri
Silami sumiiffinnik ilusilersuinermi inuit isiginiarnissaat annerusumik isiginiarneqartariaqarpoq, illorsuit portusuut sumiiffiillu angisuut najoruminaatsutut sunniuteqarsinnaasarlutik. Illoqarfimmi sumiiffinnik ilusilersuinerit isumaliutiginerani illorsuarnik portusuunik sanaartornermi pilersaarusiornerini ilaatinneqartariaqarput.
Tamatumani innuttaasunut qassinilluunniit ukiulinnut uninngaartarfinnik nunaminertanik, illoqarfik qupillugu aqqusineeqqanik, illoqarfimmi sammiviit kiisalu illoqarfimmut qanittumik sanaartukkat inissitsiterneri ilaatinneqartariaqarput. Portusuunik illorsualiornerni sukisaarsaartarfeqarneranut ilapittuutaasariaqarput, illorsuarni najugaliinnarnuunngitsoq taakkunaniluunniit sulisuinnarnuunngitsoq, aammali illoqarfiup innuttaanut tamanut. Illorsuit portusuut eqqaanni nunaminertaq ima aaqqissuunneqassaaq ilusilersorlugulu isikkua atuuffialu illoqarfiup sinneranut ataqatigiissalluni illoqarfimmullu uninngaartarfittut ornikkumaneqartuuneranut ilaassalluni.
Sanaartukkap aaqqissuunnera illoqarfiullu ilaanut isumaliutigineqartariaqarpoq sanaartukkani biilinut unittarfeqarnissaanik pisariaqartitsineq, taassuma silami ilusaa pingaarnertut inissinnagu.
