Najugaqarfinni sumiiffinnut immikkoortuni tamani aalajangersarneqarpoq avatangiisinut klassit inuussutissarsiutillu suut immikkoortuni ataasiakkaani pilersinneqarsinnaanersut pillugit. Tassani pineqarput inissiaqarfinnut, inuussutissarsiuteqarfinnut, qitiusoqarfinnut il.il. tunngasut eqqarsaatigalugit.
Avatangiisinut klassinut ataasiakkaanut immikkoortiterinerit aalajangersarneqarput Avatangiisinut Pilersaarusiornermullu najoqqutassiaq, Avatangiisinut ministeriaqarfik 2004 tunuliaqutaralugu, tassanilu allaaserineqarput avatangiisinut klassinut 1-7-mut tunngasuni inuussutissarsiutit assigiinngitsut. Inuussutissarsiutini avatangiisinut klassimi 1-imiitinneqakkajupput allaffinnik suliffiit, inissianut atatillugit ilanngunneqarsinnaasut, kisianni avatangiisinut klassini qaffasinnerpaamiipput suliffeqarfiit annertuumik suliffeqarfissuusut assigisaallu, inuussutissarsiuteqarfiinnarni immikkoortuni inissinneqarsinnaasut. Avatangiisinut inatsit qaqugukkulluunniit atuuttoq innersuussutigineqarpoq.
Avatangiisinut klassilersuinermi siunertaavoq suliffeqarfinnik, sunngiffimmi sanaartukkanik, paaqqinnittarfinnik allanillu misilittakkat naapertorlugit avatangiisinut sunniisarnerit ilaatigut nipiliornermik, putsumik, tipimik, sajuppillatsitsisarnernik angallannernilluunniit sunniuteqartartut siunertamut naapertuuttumik inissinneranni avatangiisinut akornusersuilernissaat pitsaaliorniarlugit.
Suliffeqarfiit il.il. suussusaat apeqqutaatillugit immikkut avatangiisinut klassinut inissinneqartarput misilittakkat naapertorlugit avatangiisinut qanoq sunniitigisarneri malillugit. Suliffeqarfiit ataasiakkaat suuneri apeqqutaallutik sunniisarneri assigiinngitsupilussuusarput. Taamaammat avatangiisinut klassit inassuteqaataannaapput, suliffeqarfiillu ataasiakkaarlugit nalilersornerini sumut inissinneqassanersut appartinneqarlutillu qullartinneqarsinnaapput. Avatangiisinut klassit allanngortinneqarsinnaapput immikkut suliniartoqartillugu, ass. suliffeqarfiup teknologiimik minguinnermik, nipinut assersuusersuinernik il.il. atuineratigut.
Klasse 1:
Suliffeqarfiit sanaartukkallu avatangiisinik soorpianngitsumik taamaallaat sunniisartut, taamaalillutik inissianut ilanngullugit ilaasinnaalerlutik.
Klasse 2:
Suliffeqarfiit sanaartukkallu avatangiisinut annikitsuinnarmik sunniisartut, inissiaqarfiillu eqqaannut inissinneqarsinnaasut.
Klasse 3:
Suliffeqarfiit sanaartukkallu avatangiisinut annikitsuinnarmik sunniisartut, inuussutissarsiorfeqarfinnut suliffissuaqarfeqarfinnullu ilaatigut killiliinikkut mingutsitsinermik sunnertikkuminartut eqqaanni inissinneqartariaqartut.
Klasse 4:
Suliffeqarfiit sanaartukkallu avatangiisinut artukkiilaarsinnaasut, taamaammallu pingaarnertut suliffissuaqarfinnut inissinneqartariaqartut.
Klasse 5:
Suliffeqarfiit sanaartukkallu avatangiisinut artukkiingaatsiarsinnaasut, taamaammallu suliffissuaqarfinnut inissinneqartariaqartut.
Klasse 6:
Suliffeqarfiit sanaartukkallu avatangiisinut annertuumik artukkiingaatsiarsinnaasut, taamaammallu suliffeqarfissuaqarfinnut annernut inissinneqartariaqartut, taamaalilluni eqqaamiunut mingutsitsinermik sunnertiasunut kissaatigisamik ungasissusilerlugit inissinneqarlutik.
Klasse 7:
Suliffeqarfiit sanaartukkallu avatangiisinut immikkut artukkiisinnaasut, taamaammallu pingaarnertut suliffeqarfinnut avatangiisinut immikkut sakkortuumik artukkiisinnaasunut aaqqissuussanut inissinneqartussat.
Ungasissutsinut piumasaqaatinut inassuteqaatit
Inissianut, paaqqinnittarfinnut assigisaannullu tunngasunut ungasissuseqarnissaannut inassuteqaatit imaapput:
Klasse 1 - 10 m
Klasse 2 - 20 m
Klasse 3 - 50 m
Klasse 4 - 100 m
Klasse 5 - 150 m
Klasse 6 - 300 m
Klasse 7 - 500 m
Ungasissutsinut piumasaqaatit inassuteqaataannaapput. Qaninnerussappata suliffeqarfiit ataasiakkaat qanoq mingutsitsisartiginerannik nalilersornerisigut tamanna pissaaq.