Immikkoortut nutaat aqqusinermut atassuserneqassapput aqquserngullu tungaanut naammaginartumik aqqutissaqarnissaq qulakkeerneqassalluni. Aqquserngit immikkoortunut sisamanut agguarneqarput:
Aqquserngit angallaffiusut pingaarnerit - illoqarfiup immikkoortuinut ataasiakkaanut atasut. Aqqusineq biilinit oqimaatsunit aqqusaartugaasoq. Pisuinnaat sikkilertullu aqqutaat biilillu oqimaatsut aqqutaat immikkoorput. Aqquserngit assiaquteqanngillat aamma biilerluni tamakku aqqutiginiaraanni sukkanerpaamik nal. ak. 40 imaluunniit 60 km sukkassuserineqarsinnaapput. Aqqusinermi biilinik inissiisoqaqqusaanngilaq.
Aqquserngit angallaffiusut pingaarnerit tullii - illoqarfiup immikkoortuisa ilaani inissiaqarfinnut atasut. Aqquserngit taakku angallaffiungaatsiarput, biiliniilli oqimaatsuniit aqqusaartugaavallaanngillat. Pisuinnaat sikkilertullu aqqutaat biilillu oqimaatsut aqqutaat immikkoorput. Aqquserngit assiaquteqanngillat isersinnaatitaasullu killeqarsinnaasarlutik aamma biilerluni tamakku aqqutiginiaraanni sukkanerpaamik nal. ak. 40 imaluunniit 60 km sukkassuserineqarsinnaapput. Aqqusinermi biilinik inissiisoqaqqusaanngilaq.
Najukkami aqquserngit - inissiaqarfinnut ataasiakkaanut atassusiisut. Aqquserngit sumiiffimmi najugaqartuniit aqqutaapput, taamaattumillu angallanneq nikerarsinnaalluni. Angallannerit assigiinngitsut immikkoortitigaasariaqarput. Sukkassusissaq akuerisaasoq nal. ak. 40 km-iuvoq.
Inissianut aqquserngit – immikkoortut ilaannut atasut angallaffiorpianngitsullu. Tassuuna angallattut assigiinngillat. Inissiaqarfinnut aqqutit ”Pinnguartarfittut aneerasaartarfittullu” innersuussutigineqarput, taamaallaallu 15 km sukkassuserineqarsinnaassalluni. Aqquserngit taakku sukkalisaarfiusinnaajunnaarlugit ilusiligaassapput.
Aqqusinernik pilersaarusiornermi aqqusinernut assinginut imaluunniit killequsersukkanilluunniit atassusiinissaq pisariaqarpoq. Aqqusinniorfissatut nunaminertamik atugassiinermi pineqarput, aqqusineq, pisariaqarpat pisuinnarnut aqqut, kusserngit, ledningit aamma apummik niffarlunnik katersuiveqarallarneq il.il. Aqquserngit nutaat – pissutsit immikkut ittut ajornartitsinngippata – ima silissusilerneqassapput, aqquserngup sinaa/kussineq ilanngullugit:
- Aqquserngit angallaffiusut pingaarnerit: 25 m
- Aqquserngit angallaffiusut pingaarnerit tullii: 16 m
- Sumiiffimmi aqquserngit: 12 m
- Inissiaqarfinnut aqqutit: 10 m
Inoqarfinni minnerni aqqusinernut, motorilinnut ingerlaarfinnut il.il.
– pissutsit immikkut ittut ajornartitsinngippata – nunaminertamik atugassiineq 8 meterimik silissuseqassaaq, aqquserngup sinaa/kussineq ilanngullugit.